naqsh dil se na miTa zarra barabar us ka
sabt hai aaj bhi divar pe paikar us ka
main ne sahil se use Dubte dekha tha faqat
mujhe gharqab karega yahi manzar us ka
aks bhi dida-e-qatil men lahu ban ke raha
qatl ho kar bhi jama rang barabar us ka
karb-e-tanha.i zara ruuh se nikle to sahi
muntazir hai koi is dasht ke bahar us ka
ja chuka vo to samundar ki tahon men ‘mid.hat’
baiTh kar ret pe ab naam likha kar us ka
Leave a Reply