Bani Thi Kuchh Ek Us Se Muddat Ke Baad

bani thi kuchh ik us se muddat ke baad

so phir bigdi pahli hi sohbat ke baad

judai ke halat main kya kahun

qayamat thi ek ek saaat ke baad

mua kohkan be-sutun khod kar

ye rahat hui aisi mehnat ke baad

laga aag paani ko daude hai tu

ye garmi tiri is shararat ke baad

kahe ko hamare kab un ne suna

koi baat maani so minnat ke baad

suḳhan ki na taklif ham se karo

lahu tapke hai ab shikayat ke baad

nazar ‘mir’ ne kaisi hasrat se ki

bahut roe ham us ki ruḳhsat ke baad

Leave a Comment