Aal E Ahmad Suroor
khushk kheti hai magar us ko hari kahte hain
kam-nigahi ko bhi vo dida-vari kahte hain
fikr-e-raushan ko vo shorida-sari kahte hain
yaani suraj ko charagh-e-sahari kahte hain
jo tire dar se utha phir vo kahin ka na raha
us ki qismat men rahi dar-badri kahte hain
kitni be-rahm hai fitrat unhen malum nahin
jo use kargah-e-shishagari kahte hain
husn ke baab men ‘akbar’ ki sanad kaafi hai
ham bhi har ik but-e-kamsin ko pari kahte hain
ruh-e-sayyad pe khuda jaane guzar jaegi kya
aam ali-gadh men hui kam-nazari kahte hain
Leave a Reply