kis ki ankhon ka liye dil pe asar jaate hain
mai-kade haath badhate hain jidhar jaate hain
dil men arman-e-visal aankh men tufan-e-jamal
hosh baaqi nahin jaane ka magar jaate hain
bhulti hi nahin dil ko tiri mastana nigah
saath jaata hai ye mai-khana jidhar jaate hain
pasbanan-e-haya kya hue ai daulat-e-husn
ham chura kar tiri duz-dida nazar jaate hain
pursish-e-dil to kuja ye bhi na puchha us ne
ham musafir kidhar aae the kidhar jaate hain
chashm-e-hairan men samae hain ye kis ke jalve
tuur har gaam pe raqsan hain jidhar jaate hain
jis tarah bhule musafir koi saman apna
ham yahan bhuul ke dil aur nazar jaate hain
kitne bedard hain is shahr ke rahne vaale
raah men chhin ke dil kahte hain ghar jaate hain
agle vaqton men luta karte the rah-rau aksar
ham to is ahd men bhi lut ke magar jaate hain
faizabad se pahuncha hamen ye faiz ‘akhtar’
ki jigar par liye ham dagh-e-jigar jaate hain
Leave a Reply