Hath pakaD Le Ab Bhi Tera Ho Sakta Hun Main

Alam Khursheed

haath pakaḌ le ab bhi tera ho sakta huun main

bhiiḌ bahut hai is mele men kho sakta huun main

pichhe chhuTe sathi mujh ko yaad aa jaate hain

varna dauḌ men sab se aage ho sakta huun main

kab samjhenge jin ki ḳhatir phuul bichhata huun

rahguzar men kanTe bhi to bo sakta huun main

ik chhoTa sa bachcha mujh men ab tak zinda hai

chhoTi chhoTi baat pe ab bhi ro sakta huun main

sannaTe men dahshat har pal gunja karti hai

is jangal men chain se kaise so sakta huun main

soch samajh kar chaTTanon se uljha huun varna

bahti ganga men hathon ko dho sakta huun main