Iffat Abbas
rah-e-justuju men bhaTak ga.e to kisi se koi gila nahin
ki ham us ke ho ke na ji sake vo hamara ban ke mila nahin
mire fikr-o-fan pe muhit hai jo tasavvur ek ḳhuda-numa
hai talash us ki nahin pata vo ḳhuda bhi hai ki ḳhuda nahin
jo mili nahin mujhe agahi hai miri nigah se ajnabi
ho rag-e-gulu se qarib bhi to yahi kahenge mila nahin
jo basir ho vo nazar bhi de mujhe agahi ka hunar bhi de
magar ab tu meri ḳhabar bhi de ki mujhe ḳhud apna pata nahin
hain ‘shahab’ mere havas gum ki har ek shab hai shab-e-dahum
jo bujha to bujh ke hi rah gaya hai charagh phir se jala nahin
Leave a Reply