Poet
uTh jaa.e gar ye biich se parda hijab ka
dariya hi phir to naam hai har ik hubab ka
kyuun chhoḌte ho durd-e-tah-e-jam mai-kasho
zarra hai ye bhi aḳhir usi aftab ka
aisi hava men paas na saaqi na jam-e-mai
rona baja hai haal pe mere sahab ka
hona tha zindagi hi men munh shaiḳh ka siyah
is umr men hai varna maza kya ḳhizab ka
is dasht-e-pur-sarab men bahke bahut pa haif
dekha to do qadam pe Thikana tha aab ka
zahid mariz-e-ishq pe ho sharb-e-mai haram
baare ye mas.ala hai tiri kis kitab ka
juun surma kyuun na chashm men ‘qa.em’ ki ho jagah
aḳhir vo ḳhak-e-pa hai shah-e-bu-turab ka
Leave a Reply