Masarraton Ko Ye Ahl-E-Hawas Na Kho Dete

masarraton ko ye ahl-e-havas na kho dete

jo har khushi men tire gham ko bhi samo dete

kahan vo shab ki tire gesuon ke saae men

khayal-e-subh se ham astin bhigo dete

bahane aur bhi hote jo zindagi ke liye

ham ek baar tiri aarzu bhi kho dete

bacha liya mujhe tufan ki mauj ne varna

kinare vaale safina mira Dubo dete

jo dekhte miri nazron pe bandishon ke sitam

to ye nazare miri bebasi pe ro dete

kabhi to yuun bhi umanDte sarishk-e-gham ‘majruh’

ki mere zakhm-e-tamanna ke daagh dho dete

Leave a Comment