Mohammad Usmaan Arif
rah ga.i vo nigah-e-naz qalb o jigar men baiTh kar
dil men latif si ḳhalish aankh hai an.suon se tar
raat ki niind uḌ ga.i din ka sukun luT gaya
teri nigah-e-naz ne kar diya dil pe kya asar
sun na sake usi ko vo kah na saka usi ko main
aish ki dastan men jo haal tha gham ka muḳhtasar
shaḳh se gul jo gir paḌa dil se laga ke rakh liya
daur-e-ḳhizan bhi dekh luun phuul chune hain umr bhar
koi agar nihal hai koi ḳharab-hal hai
zarf ke saath saath hai un ki nigah ka asar
rang-e-chaman ko dekh kar ‘arif’-e-ḳhasta-dil ye kya
phulon pe hai kabhi nazar kanTon pe hai kabhi nazar
Leave a Reply