Sarfraz Zahid
aisi vaisi pe qana.at nahin kar sakte ham
daan ye faqr ki daulat nahin kar sakte ham
ik adavat se faraghat nahin milti varna
kaun kahta hai mohabbat nahin kar sakte ham
kisi tabir ki surat men nikal aate hain
apne ḳhvabon men sukunat nahin kar sakte ham
isti.aron ke takalluf men paḌe hain jab se
apne hone ki vazahat nahin kar sakte ham
shaḳh se toḌ liya karte hain aage baḌh kar
jin ki ḳhush-bu pe qana.at nahin kar sakte ham
be-ḳhabar yuun har ik baat ḳhabar lagti hai
ba-ḳhabar aise ki hairat nahin kar sakte ham
Leave a Reply