sab usul-e-zindagi be-kar ho ke rah ga.e
ham asir-e-kakul-e-dildar ho ke rah ga.e
hal-e-dil na-qabil iz.har ho ke rah gaya
ham kisi ke naḳhron se bezar ho ke rah ga.e
vo jo hirnon ki tarah chaukaḌiyan bharte the kabhi
vaqt ki raftar se lachar ho ke rah ga.e
jaane vaala chal basa dagh-e-juda.i de gaya
aur sab ahbab shabnam-bar ho ke rah ga.e
ba.is-e-ibrat hai kaise kaise qad-avar daraḳht
andhiy.on men vaqt ki hamvar ho ke rah ga.e
jo shagufe zinat-e-gulzar the sahab kabhi
phuul ban ke raunaq-e-bazar ho ke rah ga.e
ham samajhte the jinhen salar-e-amn-o-ashti
haif vo bhi surḳhi-e-aḳhbar ho ke rah ga.e
kya hamare saa.e men aram farma.e koi
ham to bas girti hui divar ho ke rah ga.e
kya shikayat kijiye ‘nami’ kisi begane ki
apne bhi to ba.is-e-azar ho ke rah ga.e
Leave a Reply