hai mire pesh-e-nazar chand si surat teri
gul khilaegi kisi roz mohabbat teri
baar ulfat ka na uthta kisi ashiq se magar
roz deti hai ilahi ise qudrat teri
chashm-e-maqtul ko dekha to kaha qatil ne
jaegi ta-ba-lahad saath ye hasrat teri
yas-o-arman-o-tamanna se na ghabra ashiq
rah-e-ulfat men badhaengi ye himmat teri
barkaten kis ke qadam ki hain dil-e-zar bata
roz badhti hi chali jaati hai vusat teri
kis ne roka hai tujhe kyuun nahin aati hai qaza
roz ushshaq kiya karte hain minnat teri
ja-ba-ja tere sabab se main ruka jaata huun
aaj daman men kiye deta huun fursat teri
shaaq hai teri judai dil-e-gham-ghin mujh ko
le chali su-e-bayaban mujhe vahshat teri
kibr-o-nakhvat hai ye kis chiiz pe batla vo mujhe
khaak hai teri bina kya hai haqiqat teri
saikdon jurm pe bhi rizq mujhe deta hai
ye inayat ye mohabbat ye muravvat teri
haae afsos ‘jamila’ ye hua haal tira
ab to dekhi nahin jaati hai musibat teri