jism ke gharaunde men aag shor karti hai
dil men jab mohabbat ki chandni utarti hai
shaam ke dhundlakon men Dubta hai yuun suraj
jaise aarzu koi mere dil men marti hai
din men ek milti hai aur dusri shab men
dhuup jab bichhaḌti hai chandni sanvarti hai
baghban ne roka ya le gaya use badal
baat kya hui ḳhushbu itni der karti hai
gham ki band muTThi men ret sa mira jivan
jab zara kasi muTThi zindagi bikharti hai
gaanv ke parind tum ko kya pata bideson men
raat ham akelon ki kis tarah guzarti hai
duur mujh se rahte hain saare gham zamane ke
teri yaad ki ḳhushbu dil men jab Thaharti hai
Leave a Reply