Saleem Betab
main pujari tha magar mera koi mandar na tha
jo bhi tha pahlu men mere vo mira dilbar na tha
kis qadar dilkash lagin sapne men galiyan shahr ki
khul ga.i jab aankh to phir vo hasin manzar na tha
jaane kya shai dil ke a.ine ke TukḌe kar ga.i
dekhne men us ke hathon men koi patthar na tha
bad-havasi thi miri ya tujh se milne ki lagan
jis pe dastak de raha tha main vo tera ghar na tha
baiThe baiThe yuun laga jaise pukare tu mujhe
khol kar dekha jo darvaza koi bahar na tha
vo to tha shayad koi ‘betab’ patthar ka badan
chhu ke dekha tha jise main ne tira paikar na tha
Leave a Reply