Nuzhat Abbasi
ungliyon se miTTi men suraten banate ho
ik jahan banate ho ik jahan miTate ho
ḳhaak se dobara kya asman bana loge
asman ko tum aise ḳhaak men milate ho
kya azal se pahle tha kya abad se aage hai
dekhte hain ye parda kab kahan girate ho
kar-gah-e-hasti men jab fana muqaddar hai
phir fana ke aalam ko kaise bhuul jaate ho
meri be-ghari ka bhi aaj majra sun lo
unche unche mahlon ki dastan sunate ho
zaḳhm jin ko dete ho pattharon ki barish se
pairahan se kyuun un ke phir alam banate ho
munsifi ke aa.iin ko tum ne hi to likkha hai
sar jo jhuk nahin sakta us ko kaaT laate ho
Leave a Reply