Poet
ye ajab tum ne nikala sona
raat ka jagna din ka sona
baḳht-e-ḳhufta se to ummid nahin
saath hoga kabhi us ka sona
kis qadar hijr men behoshi hai
jagna bhi hai hamara sona
mujh se tang aa ke ye bole shab-e-vasl
ye hi tum ho to na hoga sona
bas dam-e-sub.h satao na mujhe
yaad vo zid hai vo apna sona
le ke angḌa.i lipaT jaana haa.e
haa.e vo saath kisi ka sona
aap karvaT to idhar ko lijiye
janta huun main tumhara sona
sar kahin haath kahin paanv kahin
ye na.i dhaj hai nirala sona
phir shab-e-vasl ho phir ho ya-rab
jagna mera aur un ka sona
ankhen phuTen jo jhapakti bhi hon
shab-e-tanha.i men kaisa sona
vo khuli aankh vo lab par hai hansi
ham nahin mante aisa sona
raat ankhon men guzar jaati hai
in dinon hai ye hamara sona
haa.e vo vasl ki shab ka aalam
haa.e vo pichhle pahar ka sona
kya lage aankh jo yaad aa.e ‘nizam’
rakh ke zaanu pe sar us ka sona
Leave a Reply