vo log jin ko hai ab ḳhud-kushi se dilchaspi
kabhi bahut thi unhen zindagi se dilchaspi
hai rasm-o-rah bas apne mafad ki had tak
yahan kahan hai kisi ko kisi se dilchaspi
muamlat kiye jaa.en ab sipurd un ke
muamlat men jo len ḳhushi se dilchaspi
na samt dekhi na rasta ajiib aalam tha
hamen thi sirf tiri ham-rahi se dilchaspi
qubul andhera ḳhushi se koi nahin karta
kise nahin hai bhala raushni se dilchaspi
udhar jhukao to hota hai ja ke barson men
hai jin umuur men tum ko abhi se dilchaspi
‘na.im’ saare hi insan hain la.eq-e-takrim
sabhi se uns hai ham ko sabhi se dilchaspi
Leave a Reply