ḳhirad ai be-ḳhabar kuchh bhi nahin hai
na ho sauda to sar kuchh bhi nahin hai
chamak saari darun-e-shaḳh-e-gul hai
nihal-o-shaḳh par kuchh bhi nahin hai
ḳhala men bal-o-par ma.il-ba-parvaz
zamin par ghar shajar kuchh bhi nahin hai
haqiqat bhi hai paband-e-taghayyur
jahan men mo’tabar kuchh bhi nahin hai
sahm jaata huun lutf-e-dostan se
ki dushman ho to Dar kuchh bhi nahin hai
ye saara fasla dil ka hai varna
miyan-e-dasht-o-dar kuchh bhi nahin hai
Leave a Reply