khizar kya ham to is jiine men baazi sab se jiite hain
dam ab ukta gaya allahu-akbar kab se jiite hain
samajh le qasidon ne kuchh to aisi hi khabar di hai
kahen kya tujh se ai naseh ki jis matlab se jiite hain
kisi halat na ham se badh sakegi raat furqat ki
ki ham baazi siyah-bakhti men bhi is shab se jiite hain
dam apna ghut ke kab ka hijr-e-janan men nikal jaata
madad-gari-e-shor-e-naara-e-yarab se jiite hain
ise bavar kar ai gham-khvar kab ke mar gae hote
payam-e-vasl jab se sun liya hai tab se jiite hain
zaban qaabu men hai sunne ko tashbihen sune jaao
nazakat men kahan auraq-e-gul us lab se jiite hain
abas daryaft karte ho sabab is sakht-jani ka
khuda jaane ki ham ai ‘shad’ kis matlab se jiite hain