ra.egan ishq ka anjam kahan hota hai
ab mira gham tire chehre se ayaan hota hai
aaj munh moḌ ke jaane lagin yaden us ki
aaj taraj mira kucha-e-jan hota hai
gardish-e-vaqt ghalat nikla tira andaza
Thokaren kha ke mira azm javan hota hai
Tiis jab dil men ubharti hai tiri yadon ki
tab kahin apne bhi hone ka guman hota hai
ai falak kya mujhe dikhlata hai tu chand apna
is se raushan to mire dil ka dhuan hota hai
aisa tufan-e-bala-ḳhez hai us ka andaz
be-tanab aaj mira ḳhema-e-jan hota hai
asman vaale hain kyon mahv-e-sama.at ai ‘mujib’
kaun goya ye sar-e-nok-e-sinan hota hai
Leave a Reply