Ishq Kya Hai Bebasi Hai Bebasi Ki Baat Kar

Aurang Zeb

ishq kya hai bebasi hai bebasi ki baat kar

ye bhi koi zindagi hai zindagi ki baat kar

karb se TuuTa nahin main dard se marta nahin

mujh pe taari be-hisi hai be-hisi ki baat kar

vaqt se laḌta hua taqdir se uljha hua

main nahin huun sar-kashi hai sar-kashi ki baat kar

tu ḳhuda jis ko banane par ba-zid hai na-samajh

vo faqat ik aadmi hai aadmi ki baat kar

vaqt kab ka mar chuka hai aaj bhi zinda huun main

tu nahin to kya kami hai is kami ki baat kar

fa.elatun fa.elun se ham bhi vaqif hain magar

ye hamari sha.iri hai sha.iri ki baat kar