Gul-Bang Thi Gulon Ki Hamara Tarana Tha

Hatim Ali Mehr

gul-bang thi gulon ki hamara tarana tha

apna bhi us chaman men kabhi ashiyana tha

kucha men us ke naala mera be-kasana tha

apna bhi is chaman men kabhi ashiyana tha

jab koi zulf men bhi na kuchh dakhl-e-shana tha

saudai tha mizaj mera ashiqana tha

bulbul ko apna naala mauzun tarana tha

har gul bhi maail ghazal-e-ashiqana tha

nalon men bulbulon ki jo rang-e-tarana tha

fasl-e-bahar thi vo gulon ka zamana tha

uljha hua jo gesu-e-janan men shana tha

sumbul men ek aur naya shakh-e-shana tha

saudaiyon ko thi tiri uljhan bala ki raat

zulf-e-dota ka tul-o-tavil ik fasana tha

jaate hain aap aur bura haal hai mira

aati jo ab to maut ko achchha bahana tha

tir-e-nigah ki jo kaman thi judi hui

apna jigar kabhi to kabhi dil nishana tha

dariya-e-mai ki ghaat utarenge ham unhen

shirin ka ju-e-shir ka agla zamana tha

apni shab-e-visal ka allah-re ehtimam

shabnam ki shabnami thi falak shamiyana tha

kamli ko apna taan ke soya faqir mast

kya pashm tha amiron ka jo shamiyana tha

kaaba ka ehtiram khuda-saz ho gaya

us vaqt men kahan ye tira astana tha

dair-o-haram men kya tha agar ham se puchhiye

shayan-e-sajda-e-yar tira astana tha

kunj-e-qafas men shikva-e-sayyad kya karun

us ka qusur kya hai mera ab-o-dana tha

rozi hua hai dana-e-zanjir-o-ab-e-tegh

qismat ka ashiqon ki ye hai ab-o-dana tha

lohe ke the chane tire chhinte ghazab ke thi

sayyad khuub apne liye ab-o-dana tha

ho mujh sa andalib khush-ilhan asir-e-dam

sayyad ka nasib mera ab-o-dana tha

gandum jo khuld men to yahan thi sharab-e-nab

ik main tha do jagah pe mira ab-o-dana tha

rind-e-sharab-e-khar raha main tamam-umr

angur ka nasib mujhe ab-o-dana tha

main vo sadaf huun jis ke hai dariya-dili ka shor

jo hans chug raha hai mira ab-o-dana tha

bulbul ke aage apni badi baat rah gai

ghuncha se to kahin tera chhuta diya na haath

rangin-khayaliyan dam-e-fikr-e-sukhan na thiin

zeb tan-e-urus libas-e-shahana tha

missi kabhi mali kabhi gesu bana kiye

shab-bhar shab-e-visal men hila-bahana tha

tujh se siva to ai sanam allah ka hi naam

achchha tha haan hasin tha yusuf bura na tha

yaran-e-raftagan ka nishan khaak dhundhiye

reg-e-ravan ka qafila tha jo ravana tha

munh dekhi un ke samne kahte nahin hain ham

apni zaban pe vasf-e-dahan ghaebana tha

bad-e-bahar ja ke oda laai baagh men

kya ganj-e-shaegan zar-e-gul ka khazana tha

apna samand-e-umr jama jam ke ud gaya

shayad hamara raz-e-nafas taziyana tha

raz-e-nihan kisi pe na apna ayaan hua

na-ashna-e-gosh hamara fasana tha

pahchaniye to khaak ke putlon ki khaak ko

begana kaun kaun sa un men yagana tha

us shoala-ru ki thi jo dil-e-saf men jagah

atish-kada ye ‘mehr’ ka aina-khana tha