Taleef Haidar
ham jabr-e-mohabbat se gurezan nahin hote
zulfon ki tarah teri pareshan nahin hote
ai ishq tiri raah men ham chal to rahe hain
kuchh marhale aise hain jo asan nahin hote
danaon ke bhi hosh uḌe rah-e-talab men
nadan jinhen kahte ho vo nadan nahin hote
jalvon ke tire ham jo tamasha.i rahe hain
sau jalve hon nazron men to hairan nahin hote
allah re ye vahshat-e-ushshaq ka aalam
mahfuz kabhi jaib o gareban nahin hote
kya un ki bhi ankhon men hai mera hi gul-e-tar
aise to mere dost gulistan nahin hote
Leave a Reply