Neelam Malik
vo jaise duniya chala raha hai
faqat kahe ko nibha raha hai
ḳhuda ka jaane hai kya irada
jo phir se ham ko mila raha hai
shurua men kuchh jhijhak to hogi
tavil arsa ḳhafa raha hai
racha ke sanson men meri ghazlen
vo bansuri par suna raha hai
nahin main us se ḳhafa nahin huun
jo shaḳhs mujh ko mana raha hai
tujhe mohabbat ne Das liya na
ye niil sab kuchh bata raha hai
minute ki soi se bandh kar vo
ghaḌi men ham ko ghuma raha hai
main ek nazir vo ik musavvir
ka.i manazir dikha raha hai
hai samne hasht-pahlu rasta
har ik se gautam bula raha hai
aqab men hai us ke mauj-e-sarkash
habab ko jo bacha raha hai
koi muḳhatab nahin tha is ka
mira suḳhan be sada raha hai
main sher kahne se Dar rahi huun
ḳhayal himmat bandha raha hai
Leave a Reply