Sardar Khan Soz
pyaar ki tere nishani haa.e haa.e
meri afsurda javani haa.e haa.e
jal raha huun kab se apni aag men
soz-e-alam-e-nihani haa.e haa.e
kah rahe hain ye mire mu-e-safed
kya hui teri javani haa.e haa.e
saqiya ḳhalis pila ḳhalis pila
aag men shamil ho paani haa.e haa.e
tha koi pahlu men gardish men tha jaam
kya tha daur-e-shadmani haa.e haa.e
dil ḳhushi ka tha jo gahvara kabhi
gham ki hai ab rajdhani haa.e haa.e
puchhna us ka vo mujh se hal-e-dil
mere ashkon ki ravani haa.e haa.e
ab vo sub.hon men kahan hai dilkashi
ab kahan shamen suhani haa.e haa.e
un ke lab par bhi tabassum aa gaya
‘soz’ ki shirin-bayani haa.e haa.e
Leave a Reply