kab se sunsan kharabon men pada tha ye jahan
kab se khvabida the is vadi-e-khara ke sanam
kis ko maalum ye sadiyon ke pur-asrar bharam
kaun jaane ki ye patthar bhi kabhi the insan
sirf lab-dokht parbat hain jahan nauha-kunan
na dar-o-bam na divar o daricha koi
koi dahliz-e-shikasta na harim-e-viran
shahr ke shahr hain patal ke daman men nihan
kaun pahchanta zulmat hain siyahi ke nishan
jo nazar dhundne utthi vo nazar bhi khoi
chashm-e-mahtab bhi shabnam ki jagah khuun roi
ilm ne aaj kurede hain vo zulmat ke dher
vaqt ne jis pe bithae the fana ke pahre
jaag uthe sur-e-sarafil se gunge bahre
ta-abad jin ke muqaddar men thi duniya andher
ye magar azmat-e-insan hai ki taqdir ke pher?
ye imarat, ye minar, ye gulzar, ye khet
toda-e-khak se hasti ne liya taaza janm
ji uthe vadi-e-khamosh ke be-jan sanam
phir koi chirega zarre ka jigar qatra-e-yam
dafn kar dega jo khaliq ko bhi makhluq samet
aur ye abadiyan ban jaengi phir ret hi ret
Leave a Reply