Syed Shakeel Desnavi
kahin ek ma.asum nazuk si laḌki mare zikr par jhenp jaati to hogi
haya-bar ankhon men sapne saja.e vo kuchh soch kar muskurati to hogi
mire sher paḌh kar akele men aksar inhen zer-e-lab gungunati to hogi
mire naam phir kuchh vo likhne ki ḳhatir qalam be-irada uThati to hogi
hasin chandni ho ya savan ki rut ho kasak us ke dil men jagati to hogi
kisi ke tasavvur ko pahlu men pa kar vo sharma ke ḳhud kasmasati to hogi
mujhe pa ke bazm-e-tasavvur men tanha vo palkon ki chilman girati to hogi
baḌe pyaar se phir bahut hi lagan se vo ḳhvabon ki duniya sajati to hogi
vo ma.asum tanha pareshan si laḌki use yaad meri satati to hogi
nigahon ke badal baraste jo honge vo chhup-chhup ke aansu bahati to hogi
kisi ki hasin shoḳh ankhon men yaaro miri yaad men jhilmilati to hogi
saheli ko tasvir meri dikha kar vo sharma ke ḳhud jhenp jaati to hogi
vo ban kar sanvar kar akele men aksar ‘shakil’ ik qayamat jagati to hogi
tasavvur men mujh ko qarib apne pa kar vo shishe se nazren churati to hogi
Leave a Reply