dekh kar mai munh men paani shaiḳh ke bhar aa.ega
chiiz achchhi dekhega muflis ka ji lalcha.ega
sho.ala bhaḌka kar rahegi ye dabi aag ek din
gar vo ThanDi garmiyon se dil mira sulga.ega
kakul-e-purpech se hasil hua ye mu-ba-mu
haath ko jo khinch lega paanv ko phaila.ega
zabt-e-girya se hai nuqsan qasr-e-tan ke vaste
baiTh hi ja.ega ghar paani agar mar ja.ega
chashm-e-baddur aankh aisi hai nashili yaar ki
mohtasib ke munh men paani dekh kar bhar aa.ega
ishva chalaki karishma naaz ghamza yaar ka
garche hai qahr-e-ḳhuda par dil ko mere bha.ega
le chali gar vahshat-e-dil janib-e-sahra ‘vaqar’
ranj-o-hirman paanv dar par yaar ke phaila.ega
Leave a Reply