Poet
paḌh raha huun nisab ho jaise
us ka chehra kitab ho jaise
yuun basar kar raha huun duniya men
zindagani azaab ho jaise
shaḳh-e-qamat pe vo hasin chehra
ek taaza gulab ho jaise
yuun vo rahta hai meri ankhon men
meri ankhon ka ḳhvab ho jaise
vo mire baḳht ke ḳhazine men
gauhar-e-la-javab ho jaise
us ki hasti kitab-e-hasti ka
ik hasin intisab ho jaise
zahr-alam dil ke saghar men
ik purani sharab ho jaise
jhuuT ab bolte hain log aise
ye bhi kar-e-savab ho jaise
reg-e-dasht-e-ḳhayal men ‘shahid’
yaad us ki sarab ho jaise
Leave a Reply