jo māhtāb meñ hai vaqt-e-shab jamāl tirā
hai sub.h-dam vahī ḳhurshed meñ jalāl tirā
sabā meñ hai jo latāfat tirī latāfat hai
jamāl hai jo guloñ meñ hai vo jamāl tirā
khiñchī huī chalī aatī hai is meñ ik duniyā
samā rahā hai mire dil meñ yuuñ ḳhayāl tirā
fanā se kaam tujhe kyā ki jāvedāñ tū hai
nahīñ zavāl se nādim kabhī kamāl tirā
hai zarra zarra ‘munavār’ tirī tajallī se
kuchh ek mehr-e-mubīñ meñ nahīñ jalāl tirā