Shauq Bahraichi
ho kaise kisi va.ade ka iqrar registered
jab ḳhud hi nahin hai miri sarkar registered
kya shaiḳh o barhaman pe kare koi bharosa
tasbih registered na zunnar registered
is jumbish chitvan se koi bach nahin sakta
qatil ka mire hota hai har vaar registered
chahe bhi to ab tark-e-taghaful nahin mumkin
hai dost ki ghaflat ka ye azar registered
muddat hui dam toḌ diya amn-o-aman ne
ab ho ga.e ye hashr ke asar registered
ho paaya tire husn-e-talavvun ke karam se
iqrar registered na inkar registered
duniya hai miri tegh ka maane hue loha
hai saare zamane men ye talvar registered
tujh par tire har fel par uThne lagi ungli
tu ḳhud hai gazetted tira kirdar registered
ab husn-faroshi ke liye misr ke badle
bharat men hai naḳhḳhas ka bazar registered
tu laakh kare chehra-e-zeba ki numa.ish
hoga na tire husn ka me.aar registered
chaḌhta hai irada mira parvan tah-e-tegh
hota hai mira azm sar-e-dar registered
baiTha hua sikka hai miri fikr-e-suḳhan ka
ai ‘shauq’ na hon kyuun mire ash.ar registered
Leave a Reply