dushman ki dosti hai ab ahl-e-vatan ke saath
hai ab khizan chaman men nae pairahan ke saath
sar par hava-e-zulm chale sau jatan ke saath
apni kulah kaj hai usi bankpan ke saath
kis ne kaha ki tuut gaya khanjar-e-farang
siine pe zakhm-e-nau bhi hai dagh-e-kuhan ke saath
jhonke jo lag rahe hain nasim-e-bahar ke
jumbish men hai qafas bhi asir-e-chaman ke saath
‘majruh’ qafile ki mire dastan ye hai
rahbar ne mil ke luut liya rahzan ke saath
Leave a Reply