Muzaffar Warsi
chaap aa.e ki mulaqat ho avaze se
kab se tanha.i lagi baiThi hai darvaze se
mujh se tasvir talab karti hain meri ankhen
main ne kuchh rang chune the tire shiraze se
saf-goi se ab a.ina bhi katrata hai
ab to pahchanta huun ḳhud ko bhi andaze se
main to miTTi ka badan oḌh ke ḳhud nikla huun
kya Darati hain hava.en mujhe ḳhamiyaze se
apne chehre pe na auron ke ḳhad-o-ḳhal saja
ruup aata hai kahin utre hue ghaze se
jhuTi azmat ki pujari hai ‘muzaffar’ duniya
pasta-qad log bhi guzren baḌe darvaze se
Leave a Reply