gham ki garmi se dil pighalte rahe
tajrabe ansuon men Dhalte rahe
ek lamhe ko tum mile the magar
umr bhar dil ko ham masalte rahe
sub.h ke Dar se aankh lag na saki
raat bhar karvaTen badalte rahe
zahr tha zindagi ke kuuze men
jante the magar nigalte rahe
dil raha sarḳhushi se begana
garche arman bahut nikalte rahe
apna azm-e-safar na tha apna
hukm milta raha to chalte rahe
zindagi sarḳhushi junun vahshat
maut ke naam kyuun badalte rahe
ho ga.e jin pe karvan pamal
sab unhi raston pe chalte rahe
dil hi gar ba.is-e-halakat tha
ruḳh havaon ke kyuun badalte rahe
ho ga.e ḳhamushi se ham ruḳhsat
saare ahbab haath malte rahe
har ḳhushi ‘arsh’ vaj.h-e-dard bani
farsh-e-shabnam pe paanv jalte rahe
Leave a Reply