tira lahza vahi talvar jaisa tha
miri gardan men ḳham har baar jaisa tha
utar jaata to rusva.i bahut hoti
ki sar ka bojh bhi dastar jaisa tha
tarashi hain gham-e-dauran ne taqdiren
ye ḳhanjar bhi kisi auzar jaisa tha
hansi bhi ishtiharon si chamakti thi
vo chehra to kisi aḳhbar jaisa tha
bahut rishte the sab ki qimaten tai thi
hamare ghar men kuchh bazar jaisa tha
Leave a Reply