Kisi Ke Dast-E-Talab Ko Pukarta Hun Main

kisī ke dast-e-talab ko pukārtā huuñ maiñ

uThāo haath mujhe maañg lo duā huuñ maiñ

mire azal aur abad meñ nahīñ hai fasl koī

abhī shurūa abhī ḳhatm ho gayā huuñ maiñ

basī hai mujh meñ yugoñ se ajiib vīrānī

badan se ruuh talak be-karāñ ḳhalā huuñ maiñ

na koī aag hai mujh meñ na raushnī na dhuāñ

kisī ke ḳhvāb meñ jaltā huā diyā huuñ maiñ

nazar ke vāste apnā nazāra kaafī hai

ḳhud apnā aks huuñ ḳhud apnā ā.īna huuñ maiñ

bhaTak rahā huuñ maiñ be-ant shāh-rāhoñ par

tumhāre shahr meñ bilkul nayā nayā huuñ maiñ

Leave a Comment