Sheen Kaaf Nizam
vo kuchh is tarah chahta hai mujhe
apne jaisa bana diya hai mujhe
is tarah us ne ḳhat likha hai mujhe
jaise dil se bhula diya hai mujhe
gar nahin chahta tu pichhle pahar
kyuun duaon men mangta hai mujhe
jis pe phalte nahin dua ke peḌ
us zamin se pukarta hai mujhe
taḳhliye men na jaane kitni baar
likhte likhte haTa chuka hai mujhe
lamha lamha ugane ki dhun men
qatra qatra Duba raha hai mujhe
vasta de ke mausamon ka ‘nizam’
vo daraḳhton se mangta hai mujhe
Leave a Reply