tum se ab kamyab aur hi hai
aah ham par azaab aur hi hai
us ko aina kab pahunchta hai
husn ki ab-o-tab aur hi hai
rind vaaiz se kyuun ki sarbar ho
us ki chhu, ki kitab aur hi hai
hijr bhi kam nahin hai dozakh se
is safar ka azaab aur hi hai
us ko lagti hai kab koi talvar
tegh-e-abru ki aab aur hi hai
yuun to hai surkh yaar ka chehra
par piye jab sharab aur hi hai
mujh ko is niind se nahin aram
mujh ko rahat ka khvab aur hi hai
bahs-e-ilmi se kab hain ye qaail
jahilon ka javab aur hi hai
yaad men teri zulf-o-kakul ki
dil ke taiin pech-o-tab aur hi hai
us sitamgar ka mujh pe har saaat
jaur-o-zulm-o-azab aur hi hai
kis tarah se guhar kahun ‘taban’
us ke dandan men aab aur hi hai