miir ho mirza ho miira ji ho
na-rasa haath ki nam-naki hai
ek hi chikh hai furqat ke bayabanon men
ek hi tul-e-alam-naki hai
ek hi ruuh jo behal hai zindanon men
ek hi qaid tamanna ki hai
ahd-e-rafta ke bahut khvab tamanna men hain
aur kuchh vahme ainda ke
phir bhi andesha vo aina hai jis men goya
miir ho mirza ho miira ji ho
kuchh nahin dekhte hain
mahvar-e-ishq ki khud-mast haqiqat ke siva
apne hi biim o raja apni hi surat ke siva
apne rang apne badan apne hi qamat ke siva
apni tanhai-e-jan-kah ki dahshat ke siva!
dil-kharashi o jigar-chaki o khun-afshani
huun to nakam pe hote hain mujhe kaam bahut
muddaa mahv-e-tamasha-e-shikast-e-dil hai
aina-khane men koi liye jaata hai mujhe
raat ke phaile andhere men koi saaya na tha
chand ke aane pe saae aae
saae hilte hue ghulte hue kuchh bhuut se ban jaate hain
miir ho mirza ho miira ji ho
apni hi zaat ki ghirbal men chhan jaate hain
dil-kharashida ho khun-dada rahe
aina-khane ke rezon pe ham istada rahe
chand ke aane pe saae bahut aae bhi
ham bahut sayon se ghabrae bhi
miir ho mirza ho miira ji ho
aaj jaan ik nae hangame men dar aai hai
mah-e-be-saya ki darai hai
yaad vo ishrat-e-khun-nab kise
fursat-e-khvab kise