la pila saaqi sharab-e-arghavani phir kahan
zindagani phir kahan nadan javani phir kahan
do ghadi mil baithne ko bhi ghanimat janiye
umr faani hi sahi ye umr-e-fani phir kahan
aa ki ham bhi ik tarana jhuum kar gaate chalen
is chaman ke taeron ki ham-zabani phir kahan
hai zamana ishq-e-salma men ganva de zindagi
ye zamana phir kahan ye zindagani phir kahan
ek hi basti men hain asan hai milna aa milo
kya khabar le jaae daur-e-asmani phir kahan
fasl-e-gul jaane ko hai daur-e-khizan aane ko hai
ye chaman ye bulbulen ye naghma-khvani phir kahan
phuul chun ji khol kar aish-o-tarab ke phuul chun
mausam-e-gul phir kahan fasl-e-javani phir kahan
akhiri raat aa gai ji bhar ke mil len aaj to
tum se milne dega daur-e-asmani phir kahan
aaj aae ho to sunte jaao ye taaza ghazal
varna ‘akhtar’ phir kahan ye sher-khvani phir kahan
Leave a Reply