dil kitna farebi hai adakar na ho jaa.e
ye rauzan-dar-rauzan-e-divar na ho jaa.e
ik ḳhvab tire vasl ki ḳhushbu se racha ḳhvab
ye ḳhvab mujhe ba.is-e-azar na ho jaa.e
ye hanste hue log ye mahke hue manzar
ye bhiiḌ kahin vaqif-e-asrar na ho jaa.e
dil hai kisi ummid ke saa.e men farozan
yak-tarfa tasalli ka saza-var na ho jaa.e
ye vasvasa-e-kaun-o-makan hasil-e-tashkik
vo shaḳhs kahin mujh men giraftar na ho jaa.e
‘rahil’ main kisi shaam ka bujhta hua suraj
duniya hi kahin meri azadar na ho jaa.e
Leave a Reply