Jaleel Aali
hava bhi zor pe thi tez tha bahav bhi
laḌi hai ḳhuub magar kaghzi si naav bhi
abhi se haath chhuḌate ho vapsi ke liye
jo chal paḌe ho to phir saath saath aao bhi
jise jahan ki ravish duur le ga.i us ko
qarib la na sakin tum miri vafao bhi
bandha raha bahar-andaz halqa-e-yaran
hava hai sard kahin dard ka alaav bhi
baja ki meri tabi.at bhi la-ubali thi
pa zud-ranj tha duniya tira subhav bhi
ibadaton ki sharaben bhi pi chuka lekin
sukun de na sake tum mire ḳhudao bhi
Leave a Reply