hayat vaqf-e-gham-e-rozgar kyuun karte
main sochta huun ki vo mujh se pyaar kyuun karte
na meri raah men taare na mere paas charagh
vo mere saath safar iḳhtiyar kyuun karte
nigah sirf bulava nahin kuchh aur bhi hai
ye jante to tira e’tibar kyuun karte
gham-e-hayat men hota agar na haath tira
to ham ḳhirad men junun ko shumar kyuun karte
koi to baat hai varna jafaon ke maare
tujhe bhula ke tira intizar kyuun karte
‘nazar’ chaman men agar vaqa.i bahar aati
to phuul ḳhvahish-e-abr-e-bahar kyuun karte
Leave a Reply