Anjam Shab-E-Gham Ka Likha Aur Hi Kuchh Hai

Kausar Siddiqi

anjam shab-e-gham ka likha aur hi kuchh hai

lagta hai ki manzur-e-ḳhuda aur hi kuchh hai

shayad abhi tashḳhis-e-maraz ho nahin paa.i

bimari hai kuchh aur dava aur hi kuchh hai

sab pyaar ki tash.hir kiya karte hain lekin

mahaul hai kuchh aur faza aur hi kuchh hai

na-fahm agar naghma samajhte hain to samjhen

gulshan men anadil ki nava aur hi kuchh hai

gahvara-e-har-shaḳh men gul hai abhi bechain

gulshan ki abhi ab-o-hava aur hi kuchh hai

har gaam pe chubhne lage kyon paanv men kanTe

niche ravish-e-gul ke bichha aur hi kuchh hai

duniya men har ik shai ke muqaddar men hai jalna

jalne ki magar sab ki ada aur hi kuchh hai

ma.alum hai jalta hai charaghon men faqat tel

lekin tiri mahfil men jala aur hi kuchh hai

honTon pe tabassum liye phirte raho ‘kausar’

chehre pe magar haal likha aur hi kuchh hai