Hafeez Banarasi
ye aur baat ki lahja udaas rakhte hain
ḳhizan ke giit bhi apni miThas rakhte hain
kahen to kya kahen ham un ki sada-lauhi ko
jo qatilon se tarahhum ki aas rakhte hain
kisi ke samne phaila.in kis liye daman
tumhare dard ki daulat jo paas rakhte hain
unhen hayat ki tohmat na do abas yaaro
jo apna jism na apna libas rakhte hain
qarib-e-gul-badnan rah chuke hain divane
ye ḳhaar vo hain jo phulon ki baas rakhte hain
kahan bhigo.e koi apne ḳhushk honTon ko
ye daur vo hai ki dariya bhi pyaas rakhte hain
ḳhuda ka shukr ada kiije ḳhush-nasibi par
‘hafiz’ aap dil-e-gham-shanas rakhte hain
Leave a Reply