Poet
us se kya chhup sake bana.i baat
taaḌ jaa.e jo dil ki aa.i baat
kahiye guzri hai ek saan kis ki
kabhi bigḌi kabhi ban aa.i baat
rahe dil men to hai vo baat apni
munh se nikli hui para.i baat
main samajhta huun ye na.i chalen
kabhi chhupti nahin sikha.i baat
kah diya apne dil ko ḳhud be-rahm
chhin li mere munh ki aa.i baat
rakh liya ashiqon ne nam-e-vafa
ga.i jaan par na jaane paa.i baat
rang bigḌa hai un ki sohbat ka
ab nahin hai vo ibtida.i baat
mujh se be-vaj.h hote ho bad-zan
kar ke bavar suni-suna.i baat
kya ho un ka mizaj-dan koi
ruThna khel hai laḌa.i baat
ghair ka zikr gar na tha sahab
mere aate hi kyuun uḌaa.i baat
dil men rakhta hai ḳhuub sun ke ‘habib’
chahe apni ho ya para.i baat
Leave a Reply