tira-baḳhti jo muqaddar ho jaa.e
phuul sa jism bhi patthar ho jaa.e
ashk ruk jaa.e to ankhen be-nur
aur Dhal jaa.e to gauhar ho jaa.e
ruuh sahra ki tarah pyasi hai
chashm-e-be-ab samundar ho jaa.e
rauzan-e-shahr pe ankhen hain dhari
ai ḳhuda va koi manzar ho jaa.e
ishq duniya bhi ajab duniya hai
hijr jo kaaTe payambar ho jaa.e
daulat-e-chashm-e-karam milte hi
taaj vaala bhi gadagar ho jaa.e
ishq ki lai pe hain raqsan ham tum
kaun kab jaane qalandar ho jaa.e
Leave a Reply