mai-ḳhana-e-hayat ka anjam de gaya
vo mujh ko ek TuuTa hua jaam de gaya
vo fikr-o-fan ko jazba-e-be-nam de gaya
ghazlon ko meri paikar-e-ib.ham de gaya
aaya tha saath le ke vo saughat hijr ki
ruḳhsat hua to tohfa-e-auham de gaya
zahir hue na chehre se dil ke ta.assurat
ḳhabron pe tabsira bhi bahut kaam de gaya
sahba shabab qaus-o-quzah raushni gulab
har shaḳhs tujh ko ek naya naam de gaya
duniya ki nafsiyat sama men na aa saki
har aadmi hayat ko ilzam de gaya
Leave a Reply