Najma Shaheen Khosa
jahan chaho mera naam likho, jo chaho tum ilzam likho
mujhe ishq ne barson qaid rakha mujhe, hijr ki gahri shaam likho
mire josh-e-junun ka ye tanha safar, ai charagaro tumhen kya hai khabar
mire paas hai jo bhi ye dard-e-hunar, use tum mere hi naam likho
mire lab pe abhi vo saval hai kyun? mire dil men abhi vo malal hai kyun?
mire charon-janib jaal hai kyun? mire khvab ka ab anjam likho
ye ishq-e-musalsal savan hai, man aag, to jism ik indhan hai
bas maut hai kab, ye jivan hai? use zahar-bhara ik jaam likho
kabhi dasht men khaar pe hai chalna, kabhi aag ka phuul men hai dhalna
kabhi tanha dhuup men hai chalna, use ishq ka hi inaam likho
har khvahish hai sar-e-nok-e-sinan, har chahat hai bas nauha-kunan
maalum nahin khud men huun kahan, ab chand nahin sar-e-bam likho
ye hijr jo ik tulani hai mire paas jo ek nishani hai
‘shahin’ ye miri jo kahani hai, use khushiyon men kohram likho
Leave a Reply