Waseem Farhat Alig
lauTte vaqt ki be-kaif thakan ko bhulen
kis ke ghar jaa.en ki us va.ada shikan ko bhulen
sahmi ankhon ke savalon ki tapan yaad rakhen
thartharate hue honTon ki kapan ko bhulen
garm sanson ki jalan sard si aahon ki tapan
kaise mumkin hai ki us sho.ala badan ko bhulen
sher kahne hi nahin deti hain yaden teri
tujh ko bhulen to ye aisa hai ki fan ko bhulen
ham vafa-kesh hain mere dil-e-andesha-shanas
ik tire ḳhauf se kya apne chalan ko bhulen
muskurate hi jahan phuul khile jaate huun
marna behtar hai jo us shoḳh-badan ko bhulen
Leave a Reply